حنين حسام تظهر في أسوء حالاتها في جلسة المحاكمة اليوم

ظهرت حنين حسام النهاردة في أتعس وأسوء حالاتها النفسية أمام الحضور بعد ما سمعت أقوال الشهود عنها في قضية الإتجار بالبشر. الجدير بالذكر إن شهود القضية جميعًا امتنعوا عن حضورالجلسات السابقة وده اضطر القاضي أنه يهددهم بالسجن لو مظهروش وأدلوا بشهادتهم. 

أثناء بكاء حنين وانهيارها، خرجت كلمات عفوية ممزوجة بمشاعر مختلطة كتير محدش عرف يحدد موقفه منها، وقالت: " والله ما عملت حاجة، أنا عايزة أرجع لبابا وماما". بس ده مكنش أول انهيار ليها، هي انهارت الجلسة السابقة بنفس الشكل ويمكن أكتر واتكلمت مع القاضي مباشرةً وقالت: "ابوس ايدك انا بقالى شهور هنا تعبت و عايزة اخرج لأهلى لانه محتاجنى و انا محتاجة ليهم جدا، ارجوك اعتبرنى بنتك و طلعنى من هنا انا بموت". من الحاجات الملفتة أن والد حنين وعائلتها كلهم مساندين ليها بشكل كبير وده ظهر بشكل واضح النهاردة في المحكمة أما والدها فقد سيطرته وزعق للناس اللي بتحاول تصورها وتتكلم معاها وهي بتعيط. 

أقوال الشهود كانت ضد حنين بشكل كلي وده اللي أدى لانهيارها النهاردة، فقالت واحدة من الشهود عند سؤالها عن حيثيات جريمتها أنها كانت بتحلم تدخل مجال الإعلام وحنين استغلت ده واقنعتها بتصوير فيديوهات وبثها مقابل مبالغ فارهة.

اتحكم على حنين من فترة غيابيًا ب 10 سنوات سجن وغرامة 200 ألف جنية بتهمة الإتجار بالبشر والتحريض على أعمال منافية للآداب العامة.، طب أية المحاكمات الجارية دلوقتي؟ حاليًا بيتم إعادة محاكمة حنين وتم تأجيل جلسة الإعادة النهاردة ليوم 22 مارس المقبل للنطق بالحكم الأخير. 

بس في النهاية، هل هيتم تغيير أي شئ في مصيرها في ظل أقوال الشهود الجديدة اللي كلها إدانة تامة لحنين؟