معًا للقضاء على الخصوصية وشوية حاجات تانية
جولة سريعة في أشكال ال Dates الجديدة
Bassant Elfaramawy
من بداية 2022، بدأت تظهر سلالة جديدة من العلاقات بداية من تطبيقات بننزلها وصولًا لبرامج بنحضرها وما خفي كان أعظم. بس السلالة دي مش نادرة ولا حاجة، هي أول مرة تظهر بشكل جديد وكريتيف للناس وغالبًا هيبقى ده الشكل الجديد للعلاقات السنين الجاية ومحدش عارف الكرياتيفيتي والسنجلة مخبيين للواحد أيه!
فعشان متبقاش دقة قديمة وتستخدم طرق تقليدية بعد كدة، جمعنالك آخر مستجدات وسائل تكوين علاقات اليومين دول يمكن ربنا يكرم وتبقى فتحة خير على الوطن العربي كله:
BingeCircle وأسطورة ال Blind Dates-
الحب أعمى صحيح بس أكيد مش على طريقة (BingeCircle)! BingeCircle هي شركة إعلانات بتقدم محتوى خفيف ولطيف للناس أغلبه أفكار برا الصندوق منهم (Relationsh*t) و(Hot Spot) وآخرهم الأسطورة اللي مدوخة الناس اليومين دول- بذات البنات- (The Blind Date Show)
Blind Date هي فكرة برنامج مش برا الصندوق، هو مفيش صندوق أصلًا عشان يخرجوا براه. هو باختصار date بيجمع راجل وست معروفين أو لأ ويبقى ما بينهم حائط عازل وميشوفوش بعض طول ال date ويتقدم لهم أطباق وأصناف كتير من dipndip ويتكلموا في 3 مواضيع (Money- Social Life- Lifestyle)
يبدأوا يتعرفوا أكتر من خلال الثلاث مواضيع دول في إطار كوميدي ولذيذ وكل واحد يقول تقييم عن الثاني في كل موضوع ولو ارتاحوا بينزلوا ديت تاني ولو مرتاحوش يبقى عينك ما تشوف إلا النور!
-الحب من أول ديت
حاجة زي الحب من أول نظرة كدة بس على الطريقة الحديثة، وهو برنامج من إنتاج منصة شاهد يقدمه النجم محمد الشرنوبي والجميلة سينتيا خليفة. بيتكلم عن أية بقى؟
صناع البرنامج بيجمعوا ناس من على مواقع التواصل الاجتماعي باعتين مواصفات شريك حياتهم وبيوفقوا المواصفات مع بعض، وبينظموا كل حاجة بحيث الاثنين يدخلوا عالم بعض أكثر ويتعرفوا على بعض أكتر وأكتر وكل ده متصور من بداية علاقتهم لنهايتها.
الصراحة غاية، بس (بصراحة مع) خلوها وسيلة
برنامج (بصراحة مع) مش بيعتمد على مواضيع رومانسية الصراحة بس بيعتمد على خلق حوار صريح قوي بين أي اثنين، حتى لو كانوا منفصلين! وده اللي شوفناه في حلقة الفنانة غادة عادل وزوجها السابق المخرج مجدي الهواري وعرفنا من خلالها تفاصيل كتير رومانسية وجميلة ما بينهم خلت الجمهور يتفاعل مع علاقتهم ويحب المواجهات من النوع ده.
هو Tinder ولا Tender؟
Tinder هو تطبيق عادي جدًا زي باقي التطبيقات اللي بنسخدمها يوميًا بس فجأة اتحول لمنصة تعارف للناس من مختلف البلاد بهدف عاطفي بحت، والناس العادية بدأت تخاف تنزله عشان لو حد عرف هيقيم عليهم الحد بأنهم بيستخدموه لأغراض عاطفية من غير تفكير كتير.
في النهاية، الدنيا بتتغير والناس بتتغير بس العلاقات مبتتغيرش، هتفضل عاملة قلق واحنا مكملين معاها!
